Es muess 1924 gsii syy, genau wisse mer das nimme. In däm Joor het d Herremättli e Waage ka, wo mit Blueme verglaidet gsi isch, allerdings sinns kaini ächte gsi. No der Fasnacht isch drum e Brief vom Comité koo, und alli sinn gschpannt gsi, wievyyl Subvention ass mer bikemme. D'Enttyschig isch gross gsii, wo mer hänn miesse lääse, ass mer kai Subvention bikemme, will me z Basel Fasnacht miech, und mit unserem Waage sötte mer am Bluemecorso in San Remo dailnää. Unterschrift: "Fürstenberger". Jetz, was mache? S'Gäld hämmer dringend neetig gha, und do isch aim folgendi Idee koo: Dr Obmaa und dr Seggelmaischter hänn sich mit Brief und Foti uffgmacht Richtig Domizil vom Firscht, hänn deert heftig aaglopft und no-n-em Huusherr gfroggt. Doch dää isch laider nit aawääsend gsi. Uff d Froog vo dr Frau Fürstenberger, ob si em ebbis kenn uusrichte, hänn die zwai denn d Foti und dr Brief vorzaigt und si gfroggt, ob si ihre Maa nit kennt umschtimme. Sy het dr Brief glääse und d Foti aagluegt und gsait: "Wartet e Momänt." Und wo si zrugg ko isch, het si iine e Couvert in d Händ druggt und gsait: "Do hänn er e Subvention vo mir, denn eyere Waage het mir am beschte gfalle vo alle." Die zwai hänn sich rächt härzlig bidanggt und sinn gange, aber nit wyt, denn si sinn wahnsinnig gschpannt gsi, wievyyl im Umschlag schteggt. Si hänn denn ihre Auge nit draut, es isch nämlig meh gsi, als si als Subvention erwartet hänn.Und e so het im Johr 1922 e Schryybe vom Comite uusgseh.

Amme Fasnachtsmääntig sinn si vor Abfahrt no im Restaurant Hildebrand gsi go-n-e Bier dringge. Si sinn denn uffbroche, und dr domoolig Obmaa het gseh, ass si d Bächer halbvoll hän lo schtoo. Si sinn denn am Claraplatz in d Route und iiber die Mittleri Brugg d Freie Strooss duruff an Äscheblatz, dr Stainebärg ab, bim Comité verbyy wiider zrugg ins Glaibasel und an dr Muschtermäss in s Restaurant Schönegg und deert hets denn ändlig e Bier gää mit dr Bimerggig vom Obmaa: „Ych will eych leere, Bier schtoo z loo!"

Es het 1947 e Bolemik in de Basler Zytige gää, will in dr Lange-n-Erle uff de Bänggli jeede-n-Oobe Hochbetriib im Schmuuse gherrscht het.

In unserem Sujet 1948 hänn denn d Herremättli vorgschlaage, me kennti pro Schmutz e Frangge haische, das wurdi de Basler Finanze au guet due.

Unser Goschdyym isch denn au dr Schmitzli-Frangge-Kassierer gsii, und do het jede-n-uff de Aggsle e Kässeli gha.

Wenn mer sälli Fasnacht fir jeede Frangge, wo mer in dääne Schpaarbiggse gha hänn, hätte-n-e Schmutz miesse gää, denn hätt alle no dr Fasnacht s Muul wee due. Aber e billigi Fasnacht isch es gsi, denn mer hänn alles, was drungge worde isch, uss unsere Gäldbiggse kenne zaale.

Mit dr Bolizey hänn mir, sovyyl bikannt isch, numme aimol z due gha, und das isch esoo gsi:

Vier vo uns sinn no-n-em Nachtässe im Restaurant Warteck dur d Rhyfälderstrooss gloffe. Underwäggs hänn si en ere ältere Frau, wo im erschte Stogg zem Fänschter uusegluegt het, e baar Orange uffegschiggt und mit ere plauderet. Das het amme Mitbiwooner im dritte Schtogg nit passt, und är het e Kiibel Wasser aabegläärt. Iber das aabe hänn unseri vier däm si Auto gnoh (s'isch numme e Doppolino gsi) und uff die anderi Stroossesyte uff s Drottoir gschtellt. Das het ene noone Kiibel Wasser und s Erschyyne vo dr Bolizey yybrocht. Schpeeter denn no jedem e Schtroofzeedel und däm suure Huusbiwooner zwai, will är dr Bolizey gsait het, ass dr zwaiti Kiibel nit vo iim gsii syg, sondern vo synere Frau.

1952 hämmer zwai Hochhyyser uff em Waage gha, und do sinn iiber 150 Fänschter druffgmoolt gsi. Aine het am Sunntignoomidaag denn gmaint, die Fänschter miesse Raame ha und het ebbe 10 gmoolt. Dr Räschte het denn dr Mooler deerfe moole, was äär mit wenig Bigaischterig au gmacht het. Wo-n-er fertig gsii isch, isch äär in Schalander yynekoo und het gmaint, das Bier haig äär jetz verdient. Dr glych isch denn uuse go die Hochhyyser inspiziere und het gfunde, es gheere no Fänschtergryz dry und het em wiider ebbe 10 voorgmoolt, isch wiider yynekoo und het im Mooler gsait, die Hochhyyser syge noonig fertig. Unsere Mooler het denn halt die 150 Fänschtergryz au no gmoolt. Mir hänn iin weder gheert flueche, no mit de Zeen gnirsche, denn mir hänns im Schalander sauglatt gha.

Aine vo unsere Obmänner het aigentlig nie ebbis zem Sujet gsait. Das isch im Mooler und de andere iiri Sach gsii. 1955 isch als Sujet dr Uusver­kauf gwäält worde, und denn isch es loosgange. Unsere Obmaa het pletzlig Idee entwigglet und Vorschleeg gmacht, wo denn au uusgfiert worde sinn.

Wohäär äär die Idee gha het, het sich schpeeter zaigt, nämmlig wo mer e Fotti vom Waage uss em Johr 1933 gsee hänn, denn säll Joor het unsere Obmaa au scho mitgmacht, und wenn de die beide Fottene verglyychsch, denn waisch Bschaid.

S Sujet 1959 isch dr reservierti Grossroots-Parggblatz uff em Minschterblatz gsi. Das hets in sällere Zyt no gää, hitte bikemme si heggschtens no e Veloschtänder. Wie das Sujet uusgange isch, kasch in de Zyttigsartiggel vo dr Noochrichte und dr Nati-Zyttig lääse.

"Einen gelungenen Scherz haben sich gestern in aller Frühe ein paar Fasnächtler geleistet, die mit einiger Sicherheit der Herremättli-Clique nahestehen dürften, die bekanntlich an der Fasnacht dr Grossroots-Parking-Reservierigs-Bluff uff em Minschterplatz aufs Korn genommen hat. Man erinnert sich: Das Polizeidepartement hat für die Grossräte an jenen Donnerstagen, da sie sich im Rathaus besammeln, einen eigenen Parkplatz auf dem Münsterplatz angelegt, was einigen Staub aufgewirbelt hat, zumal es «gewöhnlichen Sterblichen» untersagt war, auf einem reservierten Platz ihre Wagen abzustellen. Wie dem auch sei: Heute morgen stand dr Draumwage fir Nit-Grossreet mit der Polizeinummer «Leerach 78 O-JE» der Herremätteli-Clique ausgerechnet auf jenem reservierten Parkplatz - zum Gaudi aller jener, die über den Münsterplatz pilgerten. Das Polizeidepartement hat Humor bewiesen und hat ihn kurzerhand stehenbelassen!"

Mer hänn e mol e Sujet iiber s Drottinettfahre uff de Drottoir gha und sälber Drottinet baut. Mit dääne Fahrzyyg sinn mer dr Stainebärg aabegfaare und durch s Schittle isch am ainte e Naagel uuseko. Dää, wo das Drottinet gfaare het, isch zem e Bolizischt aane, het em dr Längger in d Händ druggt und dää het das Drottinet brav ghebt. Denn het er em dr Guugelhopf abzooge und dermit dr Naagel wieder ganz yynegschlaage, em Bolizischt dr Helm wiider iibergschtilpt und isch under em verschtuunte Bligg vom Bolizischt und em Glächter vom Publikum wiider wytergfaare.

Aine vo-n-is het immer e Käppli aa gha, wo-n-er uss em e alte Huet gmacht het, das het ussgsee wien e Kappe vom ene Mench.

Aimol sinn mer vor em Nachtässe no im Beggerstiibli gsässe mit zwai Frailain an unserem Disch. Wo unsere "Mench" uff d Toilette gange isch, hänn is die in iirem Schwarzbuebe-Dialäggt gfroggt, ebb das e Kloschter­brueder sig, denn är isch maischtens e rueige gsi. Mir hänn denn gsait, ass är e Kloschterbrueder vo Dornach sig, und dr Prior gäb em das Joor d Erlaubnis, Fasnacht z mache, will si Babbe e Grindigsmitgliid gsi sig und mer das Joor 50 worde syyge.

Die zwai hänn das nit so rächt welle glaube, aber wo är zrugg ko isch und gheert het, ass die zwai imme Schuelaade als Verkaiferinne schaffe und är si gfroggt het, ebb si au Hailandsandale haige, hänn si grossi Auge gmacht, s Muul uffgschperrt und sinn vo unserer absolute Eerligkait iberzyggt gsi.

An dr Fasnacht 1985 hän mir 150 Joor Musetämpel (Stadttheater) als Sujet gwäält. D Larve isch denn nit ganz eso uusekoo wie sich dr Kinschtler das voorhär voorgschtellt het. Sy hett ussgseh, wie e groosse Bapyyrkiibel mit em e Hienerschnaabel. Z'erscht hätt oobe solle Strau uuseluege, was me denn aber wiider zugunschte vo farbigem Hiennerfluum verwoorfe het. S Fäärbe vom Fluum het aber au numme Belle und e feerchterligi Sauerei und sunscht nyt brocht. Also hets am Änd denn aifach uffglyymte Metall-glimmer, wo me sich fascht d Finger dermit verschnitte het, ussedruff gää.

Was aber s aigentlige Iibel vo dääre Larve gsii isch, ass sy eso vyyl Gwicht ganz wyt oobe gha het, ass si aim reegelmäässig bim aabeluege (was me jo uff em e Waage bikanntlig ständig macht) vom Kopf grutscht isch. Ain vo uns hett kurzerhand hinde unde zwai Flachyyse in d Larve yynegschrubt, will är vom Helmrieme aazieh Kopfwee griegt het. D Larve isch dernoo zwar ebbe dopplet so schweer gsii, aber s Kopfweh het en weenigschtens nimme bloggt. Nadyyrlig muess dääjeenigi das au hit no ebbe emool gheere. Kuum aine het die Larve uffbhalte, aber es kenne sich alli, wo doozmool derbyy gsii sinn, no guet an si bsinne!

An de Wagebau-Samschtig im Landhof hän mir, oder vyylfach au Frind und Frindinne vo uns, als z Mittag kocht. So het e Zyt lang au unsere Ex-Obmaa, dr Niggi Weber e voorziiglichi Bohnesuppe fir uns kocht. Aagääblig noch em e serbische Rezäpt, was au erkläärt het, worum si ebbe emol e weeneli scharf uusekoo isch. Irgend emol isch ain uff d Idee koo, me kennt em sälbetsmoolige Obmaa, em Urs Bruder e Straich spiile. Bim Schepfe vo dr Suppe hänn mir em Urs e gueti Pryyse Chillipulver in dr Däller gstrait. Noch de erschte baar Leffel Suppe, het dr Urs mit Schweiss uff dr Stirne und Drääne in de Auge gmaint, die syg jetzt doch zimmlig schärfer, als die vo de letschte Joor uusekoo. Alli andere hänn unisono und schyynhailig uusegää, das me s nit eso schlimm wurd finde. Erscht zoobe hän mir iin denn uffkläärt.In speetere Joor het dr Niggi uf Kuttle umgschtellt, was aber nit ganz alli eso toll gfunde hänn. Drumm het me fir d Koschtverächter immer au no e Alternativ-Verpfleegig miesse baraad ha. Wie-n-em au syg, es isch em Niggi emool basiert, as d Soosse unde aaghoggt und aabrennt isch und noch em Uffriere, schwarzi Fätze in dr Soosse ummegschwumme sinn. Är het is denn bim Ässe erkläärt, das syge d Morchle wo-n-är mitkocht haig.

E mol, aafangs vom dritte Joordausig, isch dr Bummel mit ere glaine Veloduur verbunde worde. D Organisadoore hänn, vo verschiide Quelle här, zwelf Velo bsoorgt. S beschte und dyyrschte dervoo, het me em Kinschtler gää, will dä reegelmäässig Velo gfaare isch. Sy sinn dervoo ussgange, ass är sorgfältig dermit umgoo wurd. Noo-n-ere Fierig duur d ARA Blätzbums, isch me im Crazy Horse uf em Schänzli go ässe. Es sin deert zwai langi Disch fir je zwelf Persoone deggt gsii. Wo denn die zwaiti Zwelferguppe nie uffdaucht isch, het me feschtgschtellt, dass unseri zwai Organisatoore je ai mool reserviert gha hänn. Das nennt me Tyymwörgg….. Weenigschtens hänn mir denn jee zwai Dessert deerfe gniesse. Nach em Ässe hänn dr Obmaa und dr Kinschtler, jee e gueti Syygaare aazindet und gnosse. Me isch denn vyyl z frieh uffbroche, wo d AVO no lang nit aabebrennt gsii sinn. Mit dr Sygaare in ainere Hand isch denn dr Kinschtler underwäggs, mit sym Prachtsvelo, mit em e glaine Rändli in Konfliggt ko. Är het die Situazioon, aihändig eso guet gmaischteret, dass das ganze zum ene Iiberschlaag gfiert het. Dernoo hänn baidi, s Velo und si Ryter, nimm eso frisch ussgsee!

Sythäär mache mir numme no Bummel z Fuess und mit effedlige Verkehrsmittel.

D Ängländer ässe Fisch n' Chips, mir Rollmöps mit Schoggistängel.

Syt e baar Joor gits bim Mittagässe am Waage-n-Abbau-Donnschtig, Schoggistängel in Rollmöps yygwigglet. Die Spezialidäät isch nit unseri Erfindig, aber trotzdäm findes die maischte vo uns sauguet. Bedoonig uff die maischte... Es wird kaine derzue zwunge!

Unsere Benjamin het bi dr zwaite Rundi Rollmöps wiggle, d Zytig ganz hooch vor sy Gsicht miesse lipfe, sunscht hätts iin sälber glipft - was denn wiirglig gruusig gsii wäär!

Drummeli 2017

No nie in dr fascht hundertjeerige Gschicht sinn d Herremättler Waggis gsii - ai ainzigi Usnaam hän sy allerdings gmacht. Wo me d Meegligkait gha het, am Drummeli 2017 drbyy z syy, het me die Chance paggt und isch mit andere Waageglygge zämme als Waggis uff d Biini gstande. 

Sau glatt isch es gsii und woorschyynlig en aimooligs Erlääbnis - sowool d HMC-Waggis als au dr Uffdritt am Drummeli!