Jubiläe

Im 1970 het me die 50schti Fasnacht gfyyrt, was aigentlig nit ganz korräggt isch, wenn me an d'Griegsjoor und ai oder zwai anderi Ussetzer dänggt.Im 1996 hänn mir denn unser 75 jährigs gebyrend gfyyrt. Z'erscht het's unde in dr sälbetsmool nigelnagelneye Wettstaybrugg e Feschtli gäh. Yyglaade sin all unseri Frind, Genner, Verwandti, etcetera und Verträtter vo dr Wage IG, em Comité und dr Bräss. Yyschliesslig em Minu sin fascht alli ko, numme s'doomoolige Comité het's verpasst. Sy haige sich schyynt's im Termin verdoo, het's uf unseri Noochfroog ghaisse (Mir wänn jo ghaini Nämme nenne, aber dr doomoolig Wage-Verantwortlichi isch speeter emol no kurz Presidänt vom-e-ne biriemte basler Schutverain worde.....). Mir sin iiberzygt, das wär bi de hittige Comité-Mitgliider anders uusekoo.

No dr Fasnacht hänn mir denn no uf dr legendääre Lorraine (e Schiff) mit Frinde zämme e dreydäägigi Wuchenändfahrt vo Basel no Stroossburg gmacht.

 

Dooderzue git's no folgends glai's Mischterli:

Dr Standardedrääger

Fir unsere Jubiläumsbummel mit dr Lorraine, hänn mir e Standarde bäschelet. E Herremättli-T-Shirt isch iiber e Queerstägge ghängt und dä wiiderum mit zwai Kordle am e-n-e lange Stägge draaghängt worde.Uff em Schiff isch das ganze denn am Bug voorne aagmacht worde. Fir unseri Landussfliig het's jetzt naddyyrlig no e Standardedrääger bruucht. Haimlig hänn e baar vo uns zämme abgmacht, dass dr Zuefall unserem liebe Beat Roth soll die Eer zuekoo loo. Uf em Schiff het me denn e Ussloosig mit Zeedelizieh veranstalltet. Will uf alle Zeedeli dr glyychlig Namme gschtande-n-isch, isch denn au dr Beat bim erschte Landgang mit dr Standarde voruss stolziert.

Sovyyl uns bikannt isch, het är d'Umschtänd vo deere Wahl, bis zum lääse vo deere Syte, noonig erfaare!