D Larve mache d Herremättli syt Mitti vierzger Joor sälber, und die erschte Larve sinn folgendermasse häärgschtellt worde:D Gibbsform isch zerscht emol mit Schmiirsaifi yygschmiirt worde, drmit d Larve nochhär nit an dr Form gläbbt hänn.

Denn isch die erschti Schicht uff die Schmiirsaifi gläbbt worde. Das isch unbidruggts Zyttigspapier gsi. Als zwaits isch, mit Fischglaischter, e Schicht normals Zyttigspapier koo, denn e Schicht Gaze, nit grad die fyynschti, denn wiider Zyttigspapier und zem Schluss nonemol unbidruggts Zyttigs­papier. Alles in allem fimf Schichte.

Aaschliessend isch das Maischterwärgg uff em Oofe dreggnet worde.

Wenn denn uff die Art und Wyys die neetigi Aazahl Larve härgschtellt gsi isch, isch die zwaiti Phase aagloffe: D'Ussesytte isch denn nämmlig mit irgend eme Kitt verschpachtlet und nochhär gschliffe worde. Uff dr Innesytte isch mindeschtens e dreyfache Aaschtrich mit Schellagg aabrocht worde. Die Larve sinn e so hart gsy, ass d Lecher fir d Auge und s Muul mit kaim Mässer hesch kenne uuseschnyyde, sondern me het si miesse mit eme gliehige Yyse uusebrenne. Die Gsichter sinn e so hart gsi, ass de si notfalls au zem Neegel iischloo hesch kenne bruuche.

Aber drotz allem hänn si Fasnacht gmacht mit dääne Larve und ghebbt hänn si uff jede Fall. Bryysgynschtig sinn si au no gsi, und drum mache mer d'Larve hit no sälber, allerdings hämmer s Härschtelligsverfaare e weeneli gänderet.