Wie sinn d Herremättli zu ihrem Namme koo? Das isch ganz aifach! Will unseri Grinder zem greeschte Dail im Herremättli gwoont hänn, hänn sy sich eebe „Herremättli-Clique" dauft. S isch zwoor nit ganz korräggt Baaseldytsch gschriibe, s "E" im Mätteli fäält, aber doorum dien mir uns jetzt nimme umdaufe. Jetz sott me no wisse, wo s Herremätteli gsii isch! „Die Herrenmatte", wie das ghaisse het, isch zwischem Rhy und em Herremattwääg glääge. Dr Herremattwääg isch vo dr Riechestrooss zwische Hammerstrooss und Rhyfälderstrooss bis zem hittige Wettstaiblatz verloffe und vo deert uss wyter bis zer Reemergass. D Gränzacherstrooss het bi dr Reemergass e Booge gmacht und die hittigi Rhyfälderstrooss het doomols no Gränzacherstrooss ghaisse. Also, s Herremätteli isch noonem hittige Schtadtblaan duur dr Rhy, d Reemergass, d Gränzacherstrooss, d Hammerstrooss, d Riechestrooss, dr Muure vom Waisehuus und em Claragraabe bigränzt gsii. Doodrmit wäär klar, ass d Herremättli-Clique uss däm Dail vo unserer scheene Stadt kunnt, wo alles häär kunnt, wo Händ und Fiess und Bistand het - us em Glaibasel!